គ្រូបង្វឹកក្រុម DC United លោក Wayne Rooney និយាយថាគ្មានឱកាសនោះឡើយដែលក្រុមរបស់លោកនឹងបញ្ចប់នៅចំណាត់ថ្នាក់ចុងក្រោយនៅលីកកំពូលអាមេរិក Major League Soccer ក្នុងរដូវកាលនេះ ដែលជាយុទ្ធនាការពេញលេញដំបូងរបស់គាត់ក្នុងនាមជាគ្រូបង្វឹក។

Rooney បានចូលមកក្រុម DC United ពាក់កណ្តាលនៃរដូវកាលឆ្នាំ២០២២ ដោយជំនួសលោក Hernan Lozada។ យ៉ាង​ណា​មិញ ក្លឹប​ហាក់មិនទាន់ធ្វើបានល្អ​​ទេ ដោយ​បញ្ចប់​នៅបាតតារាង​ក្នុង​ក្រប​ខ័ណ្ឌ MLS ដោយ​ដាច់ពិន្ទុពីក្រុមផ្សេង​ប្រាំពីរពិន្ទុ​។

អតីតកីឡាករ Man Utd រូបនេះបាន​និយាយ​ក្នុង​វីដេអូ​ដែល​ក្លឹប​បាន​ចែក​រំលែក​នៅ​លើ​បណ្តាញ​សង្គមផ្លូវ​ការ​របស់​ខ្លួន​ថា៖ "គ្មាន​ឱកាស​ដែល​ខ្ញុំ​បញ្ចប់​នៅ​បាត​តារាង​លីកនោះ​ទៀត​ទេ​។ ខ្ញុំ​បាន​​ប្រកួត​ជា​យូរ​មក​ហើយ ហើយ​វា​ឈឺ នៅពេលអ្នកក្រឡេកមើលតារាងលីកនោះ ហើយអ្នកនៅបាតតារាង វាពិតជាឈឺចាប់ណាស់ ដូចនេះយើងត្រូវតែជំរុញទៅមុខទៀត"៕