Manchester United បានប្រកាសថា Mason Greenwood នឹងមិនលេងឲ្យក្លឹបទៀតទេ។ 

Greenwood នឹងចាកចេញពី Manchester United ដោយកិច្ចយល់ព្រមទៅវិញទៅមក បន្ទាប់ពីការស៊ើបអង្កេតផ្ទៃក្នុង រយៈពេលប្រាំមួយខែ ជុំវិញការប្រព្រឹត្តរបស់គាត់។

សូមបញ្ជាក់ថា​ Greenwood ត្រូវបានចាប់ខ្លួនក្នុងខែមករា ឆ្នាំ២០២២ បន្ទាប់ពីការចោទប្រកាន់ជុំវិញទង្វើដែលគាត់បានធ្វើ​។ ការចោទប្រកាន់លើកីឡាករអន្តរជាតិអង់គ្លេសវ័យ ២១ឆ្នាំរូបនេះ​ រួមមា​នការប៉ុនប៉ងរំលោភ និងធ្វើឱ្យមានរបួសស្នាម ត្រូវបានបញ្ចប់នៅថ្ងៃទី២ ខែកុម្ភៈ ឆ្នាំ២០២៣។

នៅក្នុងសេចក្តីថ្លែងការណ៍មួយនាពេលថ្មីៗនេះ Greenwood បានទទួលស្គាល់ថាគាត់ "ធ្វើឱ្យមានកំហុស" ហើយទទួលយក "ចំណែកនៃការទទួលខុសត្រូវ" របស់គាត់ ប៉ុន្តែបានបន្ថែមថា "ខ្ញុំមិនបានធ្វើអ្វី ដែលខ្ញុំត្រូវបានគេចោទប្រកាន់ទេ" ៕