ក្រុមអ្នកគាំទ្រ Paris Saint-Germain Ultras បានបង្ហាញពីការខកចិត្តរបស់ពួកគេ ចំពោះស្ថានភាពបច្ចុប្បន្ននៅក្នុងក្លឹប ហើយបានផ្តោតទៅលើកំពូលតារាឆ្នើម Lionel Messi និង Neymar។

ក្រុម PSG Ultras បានធ្វើការតវ៉ានៅខាងក្រៅទីស្នាក់ការកណ្តាលរបស់ក្លឹប ហើយបានវាយប្រហារទៅលើតារាទាំងពីរយ៉ាងចាស់ដៃ។ អ្នកគាំទ្រត្រូវបានគេឮស្រែកជេរបន្ទាប់ពីមានព័ត៌មានថាម្ចាស់ជើងឯក World Cup ត្រូវបានព្យួរការប្រកួតរយៈពេលពីរសប្តាហ៍ សម្រាប់ការធ្វើដំណើរទៅប្រទេសអារ៉ាប៊ីសាអូឌីត ដោយគ្មានការអនុញ្ញាត។ លើសពីនេះទៅទៀត ក្លឹបបានសម្រេចចិត្តរួចហើយថា ពួកគេនឹងមិនបន្តកិច្ចសន្យារបស់កីឡាករអាហ្សង់ទីន ដែលនឹងផុតកំណត់នៅចុងបញ្ចប់នៃរដូវកាលនេះ។

ក្រៅពីការស្រែកជេរ Messi មិនឈប់ឈរ នៅក្នុងវីដេអូដែលបានបង្ហោះដោយអ្នកគាំទ្រ PSG ផ្ទាល់ក៏មានលឺស្រែកឲ្យ Neymar ធ្វើការចាកចេញពីក្លិបផងដែរ ដោយបានបញ្ជាក់យ៉ាងច្បាស់ពីកំហឹងរបស់គេទៅលើកីឡាករដែលអាចចាត់ទុកជាកីឡាករជួរមុខរបស់ក្រុម៕