ក្រុម Tottenham ត្រូវ​បាន​គេ​រាយការណ៍​ថា​ កំពុងតែជឿជាក់​ថា​ លោក Antonio Conte កំពុង​ស្ថិត​ក្នុង​ផ្លូវ​បំបែកចេញ ​បន្ទាប់​ពី​វាយប្រហារពាក្យសម្តីទ្រង់ទ្រាយធំ ទៅកាន់ក្លិបទាំងមូល ​ក្នុង​សន្និសីទ​សារព័ត៌មាន​កាលពី​ថ្ងៃ​សៅរ៍សប្តាហ៍មុន។

Conte បានចោទប្រកាន់កីឡាកររបស់គាត់ថា អាត្មានិយម ហើយថែមទាំងបានលើកឡើងច្បាស់ៗថា បញ្ហាទាំងឡាយរបស់ Spurs បានចាក់ឫសយ៉ាងជ្រៅនៅក្នុងវប្បធម៌របស់ក្លិប បន្ទាប់ពីបានត្រឹមស្មើគ្នា ៣-៣ ជាមួយក្លិបបាតតារាង Southampton ក្នុងការប្រកួតក្របខ័ណ្ឌ English Premier League។

ថ្វីត្បិតតែកុងត្រារបស់​ Conte នឹងផុតកំណត់នៅចុងរដូវកាលនេះក៏ពិតមែន ប៉ុន្តែកីឡាករ Spurs ភាគច្រើនជឿថា គ្រូបង្វឹករបស់ខ្លួនអាចនឹងចាកចេញនៅមុនកាលកំណត់ទៅទៀត ដោយកីឡាករមួយចំនួនចង់ឲ្យរូបគាត់ចាកចេញភ្លាមៗតែម្តង ស្របពេលដែលនៅមានសំណួរជាច្រើនអំពីការគាំទ្រ Conte នៅក្នុងបន្ទប់ផ្លាស់សម្លៀកបំពាក់៕