បច្ចុប្បន្ន Arsenal នាំមុខការប្រជែង Premier League ដោយមាន៦៣ពិន្ទុ ពីការលេង២៦ប្រកួត។​ ពួក​គេ​មាន​២ពិន្ទុ​នាំ​មុខ Manchester City ដែលឈរនៅ​លេខ​២ ដោយមានមួយប្រកួតក្នុងដៃ និង​១៤​ពិន្ទុ​នាំមុខក្រុមឈរលេខ៣​ Manchester United ។

Arsenal បានយកឈ្នះលើ​ Bournemouth ដោយលទ្ធផល ៣-២ ក្នុងការប្រកួតចុងក្រោយ​ បន្ទាប់ពីកីឡាករបម្រុង Reiss Nelson បានស៊ុតបាល់បញ្ចូលទីគ្រាប់បាល់ជ័យជម្នះនៅម៉ោងបន្ថែម។ 

កំណត់ត្រាការប្រកួតក្រៅទឹកដីរបស់ Arsenal នៅរដូវកាលនេះគឺពិតជាអស្ចារ្យគួរឱ្យចាប់អារម្មណ៍ ដោយឈ្នះ១០ប្រកួត ស្មើ១ប្រកួត និងចាញ់២ប្រកួត​ ក្នុង១៣ប្រកួត។

បច្ចុប្បន្ន​ Fulham ឈរនៅលេខ៧នៅ Premier League ដោយមាន៣៩ពិន្ទុពីការលេង២៦ប្រកួត មាន១ពិន្ទុនាំមុខ Brighton និង Brentford ហើយតាមពីក្រោយ​ Liverpool ដែលឈរនៅលេខ៥ត្រឹមតែ៣ពិន្ទុប៉ុណ្ណោះ។

៦ប្រកួតចុងក្រោយ Fulham លេងឈ្នះ២ប្រកួត ស្មើ២ប្រកួត និងចាញ់២ប្រកួត​ ខណៈដែលកំណត់ត្រាការប្រកួតក្នុងទឹកដី សម្រាប់រដូវកាលនេះបង្ហាញថា ពួកគេឈ្នះ៦ប្រកួត ស្មើ៤ប្រកួត និងចាញ់៣ប្រកួត ក្នុង១៣ប្រកួតនៅក្នុងកីឡដ្ឋាន​Craven Cottage​។

ការព្យាករណ៍​ :​ ក្រុមកាំភ្លើងធំពិតជាអស្ចារ្យមិនគួរឱ្យជឿ សម្រាប់ការប្រកួតភាគច្រើនក្នុងរដូវកាលនេះ ហើយអាចទទួលបានលទ្ធផលដ៏សំខាន់ នៅពេលដែលពួកគេត្រូវការបំផុត ដូចជាអ្វីដែលពួកគេបានបង្ហាញកាលពីសប្តាហ៍ ពេលប៉ះជាមួយ Bournemouth។​ ទោះជាយ៉ាងណាក៏ដោយ អ្វីដែលពួកគេបានបង្ហាញនៅក្នុងការប្រកួតនោះ និងក្នុងការប្រកួតពាក់កណ្តាលសប្តាហ៍ជាមួយនិង Sporting គឺពួកគេក៏បានបណ្តោយឱ្យរបូតគ្រាប់បាល់ស៊ុតបញ្ចូលទីយ៉ាងងាយផងដែរ។ ការទស្សន៍ទាយការប្រកួតរវាង​ Fulham និង Arsenal របស់យើងគឺជ័យជម្នះសម្រាប់​ Arsenal​៕