អ្នកចាត់ការក្រុម Manchester City លោក Pep Guardiola បានចេញមុខមកធ្វើការឆ្លើយតបទៅលើអ្នកដែលបានរិះគន់លោក ដោយអះអាងថា លោកតែងតែ បរាជ័យជានិច្ច ថ្វីត្បិតក្រុមមួយនេះ បានទទួលភាពជោគជ័យជាច្រើន នៅប៉ុន្មានឆ្នាំចុងក្រោយនេះ។

ក្រោយយកឈ្នះ Arsenal នៅកីឡដ្ឋាន Emirates ដើម្បីឡើងមកកំពូលតារាង English Premier League ក្រុម​ Man City បែរជាភ្លាត់ស្មើជាមួយក្រុម Nottingham Forest ទៅវិញ ដោយត្រូវបានគេរិះគន់យ៉ាងធ្ងន់ៗថា ក្រុមរបស់លោកបានខ្ជះខ្ជាយច្រើន នៅតំបន់ប្រយុទ្ធ។

នៅក្នុងសន្និសីទសារព័ត៌មានកាលពីថ្ងៃអង្គារ អ្នកចាត់ការរូបនេះ បាននិយាយថា "ខ្ញុំមានអារម្មណ៍ថា ទោះបើជាយើងធ្វើបានល្អច្រើននៅប៉ុន្មានឆ្នាំចុងក្រោយនេះ ខ្ញុំនៅតែត្រូវគេមើលឃើញថា បរាជ័យជានិច្ច ព្រោះគ្មានអ្វីដែលអាចគ្រប់គ្រាន់ សម្រាប់អ្នកនិយាយទាំងនោះទេ"៕