ក្រុមបិសាចក្រហម Manchester United នឹងរំពឹងថា អាចកក់កៅអីរបស់ពួកគេក្នុងការឡើងទៅកាន់ជុំទី៤ នៃពានរង្វាន់ FA Cup នៅពេលដែលត្រូវប្រកួតជាមួយ Everton ក្នុងកីឡដ្ឋាន Old Trafford នៅយប់ថ្ងៃសុក្រ។

Man United បច្ចុប្បន្នកំពុងឈរនៅលេខ៤ក្នុងលីគ ដោយមានពិន្ទុស្មើគ្នាជាមួយនឹងក្រុម Newcastle ដែលកំពុងតែមានទម្រង់លេងល្អគួរឱ្យចាប់អារម្មណ៍​ ដោយឥឡូវនេះពួកគេលេង ១២ប្រកួត មិនដែលចាញ់នោះទេ។ ពួកគេក៏មានគម្លាតពីក្រុមឈរលេខ៥ Spurs ២ពិន្ទុផងដែរ​។ 

ការប្រកួតចុងក្រោយដែល Man Utd ប៉ះជាមួយ Everton ក្នុងលីគនោះ គឺកើតឡើងក្នុងខែតុលា ដែលពួកគេត្រូវលេងក្រៅដីជាមួយនឹងជ័យជម្នះ ២-១ ហើយពួកគេរំពឹងនឹងអាចធ្វើវាស្រដៀងគ្នាផងដែរ។ ការប្រកួតលើកនេះ ត្រូវលេងក្នុងទឹកដីរបស់ពួកគេ​ ជាមួយនឹងវត្តមានកីឡាករល្អៗ ជាច្រើនបានត្រៀមខ្លួនរួចជាស្រេច ដើម្បីបន្តការប្រកួតសម្រាប់បិសាចក្រហម។

Everton មិន​ទាន់​ឈាន​ដល់​ការរំពឹងទុករបស់​ខ្លួន​នៅ​ឡើយ​ទេ ​នៅ​រដូវ​កាល​នេះ។ ពួកគេ​ចូល​មក​ក្នុង​ការ​ប្រកួត​នេះ ​ដោយប្រកួត​ចាញ់ Brighton ៤-១ នៅ​យប់​ដែល United យកឈ្នះលើ Bournemouth។

Everton មិន​ទាន់ស្គាល់ការប្រកួត​ឈ្នះ​ទាល់តែសោះ​ក្នុង​ ៥ប្រកួត​​ចុង​ក្រោយ​ ​រាប់ពី​គ្រប់​ការ​ប្រកួត​ទាំង​អស់ ហើយ​ឈរនៅលេខរៀងទី១៦ ក្នុង​ក្រប​ខ័ណ្ឌ English Premier League ដែល​នៅ​ពី​លើ​តំបន់​កាត់​ចោល​តែ​១ពិន្ទុ​ប៉ុណ្ណោះ។

ការព្យាករណ៍​ : FA Cup ជាគោលដៅចម្បងសម្រាប់ Manchester United នៅរដូវកាលនេះ។​ ផ្ទុយទៅវិញ​ Everton ត្រូវការស្វែងរកវិធី ដើម្បីឆ្លងឱ្យផុតពីតំបន់កាត់ចោល មុនពេលដែលពួកគេត្រូវខ្វាយខ្វល់ពីពានរង្វាន់។
វានឹងមានការលំបាកខ្លាំងសម្រាប់ពួកគេ ក្នុងការដណ្តើមយកជ័យជម្នះក្នុងការប្រកួតនេះ ហើយពួកគេប្រហែលជាសង្ឃឹមទទួលបានត្រឹមការស្មើ គឺល្អបំផុតសម្រាប់ការប្រកួតនេះ។ ការទស្សន៍ទាយរវាង​ Manchester United និង Everton របស់យើងគឺក្រុមម្ចាស់ផ្ទះជាអ្នកឈ្នះ៕