Graham Potter អ្នកចាត់ការទូទៅរបស់តោខៀវ Chelsea ថាខ្លួននឹងគេចសំណួរអំពីផែនការនៃការផ្ទេររបស់ Chelsea បន្ទាប់ពីត្រូវបានសួរអំពីចំណាប់អារម្មណ៍របស់ក្លិបចំពោះកីឡាករ Enzo Fernandez និង Mykhailo Mudryk ដែលត្រូវបានគេរាយការណ៍ថាកំពុងតែជាប់ពាក់ព័ន្ធជាមួយក្លិប។

នៅពេលអ្នកយកព័ត៌មានសួរពីគោលដៅទីផ្សារដោះដូរក្រុមរបស់គាត់ លោក Potter បានបដិសេធមិននិយាយអ្វីទាំងអស់ ដោយលើកឡើងនៅក្នុងសន្និសីទសារព័ត៌មានថា "វាជាសំណួរដ៏ល្អ ប៉ុន្តែបញ្ហាគឺប្រសិនបើខ្ញុំឆ្លើយវា នោះវាច្បាស់ជាខាតពេលច្រើន ព្រោះកីឡាករគ្រប់គ្នាសុទ្ធតែពាក់ព័ន្ធជាមួយ Chelsea។ ដូច្នេះខ្ញុំត្រូវតែគេចវា ហើយខ្ញុំសង្ឃឹមថាអ្នកអាចយល់ពីមូលហេតុដែលខ្ញុំមិនអាចឆ្លើយវាបាន។ ខ្ញុំតែងតែឆ្លើយសំណួរនោះដោយនិយាយថាខ្ញុំជាគ្រូបង្វឹក ហើយការទទួលខុសត្រូវរបស់ខ្ញុំគឺចំពោះកីឡាករដែលកំពុងតែមានវត្តមានក្នុងក្រុមស្រាប់តែប៉ុណ្ណោះ"៕