នេះអាចជារឿងដែលគួរឲ្យសោកស្តាយបំផុតមួយសម្រាប់ពិភពបាល់ទាត់មួយទាំងមូល នៅពេលដែលភ្នាក់ងាររបស់ Pele បានបញ្ជាក់ថា ស្តេចបាល់ទាត់ប្រេស៊ីលរូបនេះ បានទទួលមរណភាពកាលពីថ្ងៃទី២៩ ខែធ្នូ ឆ្នាំ២០២២នេះ ដោយមូលហេតុនៃការរីកដុះដាលនៃជម្ងឺមហារីករបស់គាត់។

កីឡាករដ៏អស្ចារ្យបំផុតដែលមិនធ្លាប់មាន Pele បាននឹងកំពុងប្រឈមមុខនឹងបញ្ហាសុខភាពក្នុងរយៈពេលប៉ុន្មានឆ្នាំចុងក្រោយនេះ។ គាត់ត្រូវបានគេឃើញអង្គុយនៅលើកៅអីរុញក្នុងព្រឹត្តិការណ៍ World Cup 2018 ហើយត្រូវបានគេបញ្ជូនទៅមន្ទីរពេទ្យបន្ទាប់ពីដួល ដោយសារតែអស់កម្លាំងមួយខែបន្ទាប់ពីព្រឹត្តិការណ៍ World Cup។

Pele បានបង្ហាញខ្លួនជាលើកដំបូងសម្រាប់ Santos ក្នុងឆ្នាំ១៩៥៦ នៅក្នុងអ្វីដែលជាការចាប់ផ្តើមនៃអាជីពដែលបានធ្វើឲ្យពិភពបាល់ទាត់មានការប្រែប្រួលជាខ្លាំង។ ខ្សែប្រយុទ្ធសញ្ជាតិប្រេស៊ីលរូបនេះ បានធ្វើបដិវត្តបាល់ទាត់ជាមួយនឹងទម្រង់លេងរបស់គាត់ និងការស៊ុតបញ្ចូលទីដ៏ច្រើនក្នុងរយៈពេល ២១ឆ្នាំ ដោយបន្សល់ទុកនូវកេរ្តិ៍ដំណែល ក្នុងនាមជាកីឡាករដែលមានទេពកោសល្យបំផុត ដែលមិនធ្លាប់មាននៅលើទីលាន។

Pele ក្នុងវ័យ 17 ឆ្នាំបានបង្កើតប្រវត្តិសាស្ត្រសម្រាប់ខ្លួនឯងក្នុងទម្រង់លេងដ៏អស្ចារ្យនៅ World Cup 1958 ដោយបានជួយប្រេស៊ីលឲ្យឈ្នះពានរង្វាន់ជាមួយនឹងលេខ១០ នៅលើខ្នងរបស់គាត់​ ដោយទទួលបានរហស្សនាមថា O Rei (ស្តេច) ចំពោះទម្រង់លេងរបស់គាត់។ 

ការស៊ុតបាល់បញ្ចូលទីក្នុងវគ្គពាក់កណ្តាលផ្តាច់ព្រ័ត្រទល់នឹង បារាំង និងការស៊ុតបាល់បញ្ចូលទីក្នុងវគ្គផ្តាច់ព្រ័ត្រជាមួយនឹងស៊ុយអែត គាត់បានត្រលប់មកវិញសម្រាប់ប្រេស៊ីលក្នុងព្រឹត្តិការណ៍ World Cupឆ្នាំ 1962 ជាកីឡាករដ៏អស្ចារ្យបំផុតនៅលើពិភពលោក។

គាត់បានចូលនិវត្តន៍ដោយបានឈ្នះ World Cup ចំនួនបី ហើយបច្ចុប្បន្ននៅតែជាកីឡាករតែមួយគត់ដែលធ្វើដូច្នេះបាន ហើយនៅតែជាអ្នកស៊ុតបញ្ចូលទីច្រើនជាងគេរបស់ប្រេស៊ីលជាមួយនឹង ៧៧គ្រាប់ពីការបង្ហាញខ្លួន ៩២លើករបស់គាត់។ 

Pele ត្រូវបានគេរាយការណ៍ថាបានស៊ុតបញ្ចូលទីច្រើនជាង ១២០០គ្រាប់ ក្នុងអាជីពលេងដ៏គួរឱ្យចាប់អារម្មណ៍របស់គាត់ រួមទាំងការប្រកួតមិត្តភាព និងដំណើរកម្សាន្តជុំវិញពិភពលោក ខណៈពេលដែលបំផុសគំនិតដល់កីឡាករបាល់ទាត់ជំនាន់ក្រោយ ជាមួយនឹងទេពកោសល្យដែលមិនមានអ្វីប្រៀបផ្ទឹមបាននោះឡើយ៕