Newcastle United នឹងត្រូវ​ធ្វើ​ជា​ម្ចាស់​ផ្ទះ ដើម្បី​ទទួល​ក្រុមភ្ញៀវ Manchester City នៅក្នុង​កីឡដ្ឋាន St. James Park។

Manchester City នឹងបន្តឈរនៅលើកំពូលតារាង ជាមួយទទួលបានជ័យជម្នះក្នុងការប្រកួតនេះ ដោយពួកគេមាន៦ពិន្ទុ ពីការប្រកួតបើកឆាក២លើក។  Newcastle United អាច​នឹងឡើង​ទៅ​លើ​កំពូល​តារាង​ផងដែរ​ ​ក្នុងលក្ខខណ្ឌដែលពួកគេទទួលបាន​ជ័យ​ជម្នះ​ក្នុង​ការ​ប្រកួត​នេះ ដោយ​ពួក​គេ​ស្ថិត​នៅ​លេខ​៥​ ដោយ​មាន​៤ពិន្ទុ​ ពី​ការ​ប្រកួត​បើក​ឆាក​ពីរ​លើក​របស់​ពួក​គេ។

Manchester City ស៊ុតបញ្ចូល​បាន​៦​គ្រាប់​​ ក្នុង​រដូវ​កាល​នេះ ហើយ​ពួកគេ​មិន​បាន​របូត​គ្រាប់បាល់មួយ​គ្រាប់​ទេ។ សម្រាប់ប៉ុន្មានរដូវកាលកន្លងមកនេះ ពួកគេបានស្ថិតក្នុងចំណាត់ថ្នាក់ខ្ពស់ជាងក្រុមដទៃទៀត ហើយសម្រាប់ការចាប់ផ្តើមរដូវកាលថ្មីបានបង្ហាញថា ពួកគេមានភាពលេចធ្លោមួយកំរិតផ្សេងទៀត សម្រាប់ក្លាយជាក្រុមជើងឯក។​ ពួកគេបានទទួលជ័យជម្នះ៦លើកជាប់ៗគ្នា លើក្រុម Newcastle ហើយនៅក្នុងការជួបគ្នាចំនួន៧ប្រកួតចុងក្រោយ ពួកគេរកបានគ្រាប់បាល់យ៉ាងហោចណាស់ក៏២គ្រាប់ដែរ។

Newcastle United មិន​ទាន់ស្គាល់លទ្ធផល​ចាញ់នោះទេ ក្នុង​ការ​ប្រកួត​៤​លើក​ចុង​ក្រោយ​របស់​ពួក​គេ ដោយពួកគេប្រកួត​ឈ្នះ​៣លើក ក្នុងចំណោមការប្រកួតទាំងនោះ​។​ ការ​ប្រកួត​៣ ក្នុង​ចំណោម​ការ​ប្រកួត​៥​លើក​ចុង​ក្រោយ​ ពួក​គេ​ធ្លាប់បាន​ស៊ុត​បាល់​បញ្ចូល​ទី​២​គ្រាប់​លើក្រុម​ Man City។

សម្រាប់ការព្យាករណ៍
Manchester City និង Newcastle United គឺជាក្រុមដែលមិនទាន់ស្គាល់លទ្ធផលចាញ់នោះទេ រហូតមកដល់ពេលនេះក្នុង Premier League។​ ក្នុង​ការ​ប្រកួត​៦​លើក​ជាប់​គ្នា Man City បាន​យក​ឈ្នះ Newcastleគ្រប់ការប្រកួត​ ហើយ​សម្រាប់ការប្រកួតថ្មីៗ​នេះ​​ ក៏មានចំនួនគ្រាប់បាល់ច្រើនកើតឡើងផងដែរ​។ ទោះបីជាក្រុម Newcastle បានពង្រឹងក្រុមរបស់ពួកគេរួចជាស្រេចក៏ដោយ ក៏ពួកគេនៅតែមិនអាចផ្គូផ្គងជាមួយនិងក្រុម Man City ដែលបាននាំមុខការប្រកួតបើកឆាករបស់ពួកគេទាំងពីរ។​ ពួកយើងព្យាករណ៍ថា City នឹងនាំមុខក្នុងតង់ទីមួយ និងតង់ទីពីរ​ ដើម្បីទទួលបានជ័យជម្នះក្នុងការប្រកួតនេះ៕