អ្នកចាំទីឆ្នើមរបស់ថៃនឹងមានមុខនៅស៊ីហ្គេមវៀតណាម
អ្នកចាំទី Kawin Thamsatchanan ដែលមានបទពិសោធជោគជាំ និងជាអ្នកចាំទីឆ្នើមរបស់ជម្រើសជាតិថៃនឹងមានមុខក្នុងក្រុមបាល់ទាត់យុវជនក្រោមអាយុ២៣ឆ្នាំថៃសម្រាប់ការប្រកួតប្រជែងនៅព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម។ នេះជាការអះអាងរបស់អ្នកចាត់ការទូទៅរបស់ក្រុមបាល់ទាត់ជម្រើសជាតិថៃ លោកស្រី Madam Pang ។
អ្នកចាត់ការក្រុមបាល់ទាត់ជម្រើសជាតិថៃបានឆ្លើយតបជាមួយសំណួរពីអ្នកគាំទ្រក្រុមជម្រើសជាតិ ក្នុងការផ្សាយផ្ទាល់លើបណ្ដាញទំនាក់ទំនងសង្គមថា ម្នាក់ក្នុងចំណោម៣នាក់ដែលជាកីឡាករលើសអាយុសម្រាប់ការប្រជែងមេដាយនៅវៀតណាមក៏មាន Kawin ដែរ។ ខណៈកីឡាករលើសអាយុ២នាក់ផ្សេងទៀត នឹងធ្វើការប្រកាសឲ្យដឹងនៅពេលក្រោយ។
ទន្ទឹមនឹងនោះ លោកស្រី Madam Pang បានបន្ថែមថា អ្នកចាំទីដែលធ្លាប់ចាប់ឲ្យក្រុមជម្រើសជាតិ៦៨ប្រកួតរូបនេះនឹងកាន់តួនាទីជាប្រធានក្រុមរបស់ U23 ថៃថែមទៀតផង។
Kawin បច្ចុប្បន្នត្រូវបានក្លិប Port នៃលីគកំពូលថៃខ្ចីជើងពីក្លិប OH Leuven របស់ប្រទេសប៊ែលហ្ស៊ិក។ អ្នកចាំទីវ័យ៣២ឆ្នាំមានកម្ពស់១,៨៣ម៉ែត្ររូបនេះ ធ្លាប់លេងឲ្យក្លិប Muangthong United បានចំនួន ២៤៦ ប្រកួត ក្នុងចន្លោះឆ្នាំ២០០៨ ដល់ ២០១៨៕
ព័ត៌មានទាក់ទង
Real Madrid កំពុងកំណត់គោលដៅខ្សែការពារកណ្តាលរបស់បារាំង កីឡាករ William Saliba
ព្យាករណ៍គូ Manchester United vs Fulham
