ក្រុម​មេឃ​ខៀវ Manchester City ដណ្តើម​បាន​ចំណាត់ថ្នាក់​កំពូល​ក្នុង Premier League ពី Liverpool ជាមួយ​នឹង​ជ័យជម្នះ ៣-០ លើ Brighton កាលពី​ថ្ងៃ​ពុធ​ទី​២០​មេសា ខណៈ​កាំភ្លើង​ធំ Arsenal បាន​ស្តារឡើងវិញ​នូវ​ការជំរុញ​របស់​ពួកគេ​សម្រាប់​ក្រុម​កំពូល​តារាង​ទាំង​បួន​ដោយ​យក​ឈ្នះ​លើ Chelsea ៤-២ នៅ​កីឡដ្ឋាន Stamford Bridge ។​

Liverpool បាន​ឡើង​ទៅ​ឈរ​លើ​កំពូល​តារាង​ដោយ​ហែក Manchester United ជា​ចម្រៀក​ក្នុង​ជ័យជម្នះ ៤-០ នៅ​កីឡដ្ឋាន Anfield កាលពី​ថ្ងៃ​អង្គារ​។​

Man City មិនសូវ​ជា​លេង​បាន​ល្អ​ប៉ុន្មាន​ទេ ប៉ុន្តែ​បាន​ប្រឹង​ទប់​ការភ័យខ្លាច​របស់​ពួកគេ​ដើម្បី​វាយបក​នាំមុខ​មួយ​គ្រាប់​មុន​ក្នុងការ​ប្រជែង​ដណ្តើមពាន ដោយសារ​គ្រាប់​បាល់​នៅ​តង់​ទី​ពីរ​ពី​កីឡាករ រី​យ៉ាដ ម៉ា​រ៉េ​ស (Riyad Mahrez) ហ្វីល ហ្វូ​ដិន (Phil Foden) និង បឺ​ណា​ដូ ស៊ី​ល​វ៉ា (Bernardo Silva) ។​

​ចំណែក Arsenal ឯណោះ​វិញ​បាន​វិល​មក​រក​ទីតាំង​ល្អ​បំផុត​ដើម្បី​ប្រជែង​កៅអី Champions League បន្ទាប់​ពី​ផ្តួល​តោ​ខៀវ Chelsea ៤-២ នៅ​កីឡដ្ឋាន Stamford Bridge​។​

​ប៉ុន្តែ​ពួកគេ​មាន​ពិន្ទុ​ស្មើ​គ្នា​ជាមួយ​ក្រុម​លេខ​៤ Spurs ដោយ​ចាញ់​គ្រាប់​ស៊ុត​របស់​មាន់​ខ្នាយ​មាស​ចំនួន ៨ គ្រាប់​៕