​បិសាច​ក្រហម Manchester United នឹង​ធ្វើជា​ម្ចាស់ផ្ទះ​ទទួល​ក្រុម Leicester ក្នុង​ការប្រកួត​ដ៏​រំភើប​ នៃ​ក្របខ័ណ្ឌ Premier League នៅ​ថ្ងៃ​សៅរ៍​នេះ​ នៅ​ទឹកដី Old Trafford ។​

​ហេតុដូច្នេះ ក្រុម​បិសាច​ក្រហម​នឹង​បន្ត​ការតស៊ូ​របស់​ពួកគេ​សម្រាប់​តំណែង​លេខ​៤ បន្ទាប់​ពី​ទទួលបាន​ការជំរុញ​ដ៏​សំខាន់​តាមរយៈ​ជ័យជម្នះ ៣-២ លើ​គូ​ប្រជែង​ផ្ទាល់ Tottenham Hotspur ក្នុង​ការប្រកួត​លី​ក​ចុងក្រោយ​របស់​ពួកគេ​។​

Cristiano Ronaldo ជា​តារា​រះ​ក្នុង​ការប្រកួត​នោះ​ដោយ​ស៊ុត​បញ្ចូល​ទី​៣​គ្រាប់​ម្នាក់ឯង​ក្នុងឱកាស​នោះ​។ ទោះយ៉ាងណា តារា​ឆ្នើម​សញ្ជាតិ​ព័រ​ទុយ​ហ្គាល់​រូបនេះ មិនមាន​អំណាច​ទេ​ក្នុង​ការប្រកួត UEFA Champions League ទល់នឹង Atletico Madrid ដែល​បាន​ឡើង​ទៅ​កាន់​វគ្គ ១/៤ ផ្តាច់ព្រ័ត្រ ជាមួយ​នឹង​ជ័យជម្នះ​ដ៏​គួរឱ្យភ្ញាក់ផ្អើល ០-១ នៅ​ទឹកដី Old Trafford ។​

​កងទ័ព​របស់​លោក Ralf Rangnick ឥឡូវ​នេះ​មាន ៤ ពិន្ទុ​តាម​ពីក្រោយ​ក្រុម​កាំភ្លើង​ធំ Arsenal ដែល​ស្ថិត​ក្នុង​ចំណាត់ថ្នាក់​ទី ៤ ។ ដោយសារ​តែ​ក្រុម​កាំភ្លើង​ធំ​ក៏មាន​១​ប្រកួត​ក្នុង​ដៃ វា​ច្បាស់​ណាស់​ថា Manchester United មិន​អាច​បន្ត​ភ្លាត់ស្នៀត​បាន​ទៀត​ទេ បើ​ពួកគេ​ចង់បាន​កៅអី Champions League នៅ​ឆ្នាំក្រោយ​។​

​បិសាច​ក្រហម​គឺជា​រំពឹង​ឈ្នះ​ខ្ពស់​នៅ​ថ្ងៃនេះ ពីព្រោះ Leicester លែង​មាន​អ្វី​ត្រូវ​ដណ្តើម​ហើយ​ក្នុង ៩ ប្រកួត​សេសសល់​នៃ​រដូវ​កាល​នេះ​។​

​លោក Brendan Rodgers បានដាក់​គោលដៅ​យកពាន UEFA Conference League ដោយ​ផ្អែក​លើ​អ្វី​គ្រប់​យ៉ាង​ដែល​យើង​បានឃើញ​ពី​ក្រុម Leicester​នៅ​ប៉ុន្មាន​សប្តាហ៍​ចុងក្រោយ​នេះ​។​

​ទោះយ៉ាងណា Leicester តែងតែ​លេង​បាល់ទាត់​បែប​វាយលុក ហេតុ​ដូច្នេះ​យើង​រំពឹង​មាន​គ្រាប់​បាល់​ច្រើន​នៅ​ទឹកដី Old Trafford នៅ​ថ្ងៃ​សៅរ៍​នេះ​។​

​លទ្ធផល​ព្យាករណ៍ Man U ឈ្នះ ៣-១៕