​ក្រុម​តស៊ូ​បាត​តារាង​នឹង​ធ្វើជា​ម្ចាស់ផ្ទះ ​ទទួល​ក្រុម​សង្ឃឹម​ឈ្នះ​ពាន​ នៅ​យប់​ថ្ងៃ​សៅរ៍​នេះ ខណៈ Burnley ប្រកួត​ជា​មួយ​ក្រុម​មេឃ​ខៀវ Manchester City ក្នុង​ជុំ​ទី ៣១ នៃ​ក្របខ័ណ្ឌ Premier League នៅ​កីឡដ្ឋាន Turf Moor ។​

Burnley ជួប​រឿង​ដ៏​គួរឱ្យ​ភ័យខ្លាច​កាលពី​ខែ​មុន ដោយ​បាន​ចាញ់​ការប្រកួត Premier League ទាំងបី ដោយ​របូត​គ្រាប់​បាល់ ២ គ្រាប់​ឡើង ហើយ​មិន​បាន​ស៊ុត​បញ្ចូល​ទី​គេ​សូម្បី​១​គ្រាប់​។​

Burnley ត្រូវតែ​កែប្រែ​ជោគវាសនា​របស់​ពួកគេ​ឱ្យ​បាន​ឆាប់​តាម​ដែល​អាច​ធ្វើទៅបាន ខណៈ​ពួកគេ​ឈរ​នៅ​លេខ​២​បាត​តារាង​ដោយមាន ៤ ពិន្ទុ​រវាង​ពួកគេ និង Everton នៅក្នុង​តំបន់​សុវត្ថិភាព​។​

​ការ​ប៉ះ​ជាមួយ​ក្រុម​កំពូល​តារាង Premier League បច្ចុប្បន្ន​បាន​កើតឡើង​ចំ​ពេល​ដ៏​អាក្រក់​បំផុត​សម្រាប់​លោក Sean Dyche និង​កូន​ក្រុម​របស់​គាត់ ព្រោះ​វា​ពិបាក​ណាស់​ក្នុង​ការរំពឹង​ទទួលបាន​ពិន្ទុ​ពី​ក្រុម​ខ្លាំង​បំផុត​មួយ​នៅក្នុង​ប្រទេស​អង់គ្លេស​។​

​រឹតតែ​យ៉ាប់​ជាង​នេះ​ទៀត​នោះ​សម្រាប់​ក្រុម​ម្ចាស់ផ្ទះ គឺថា Manchester City នឹង​មាន​កម្លាំងចិត្ត​បន្ថែម​ដើម្បី​ដណ្តើមយក​៣​ពិន្ទុ បន្ទាប់​ពី​ប្រកួត​ត្រឹម​ស្មើ​ទល់នឹង Crystal Palace ក្នុង​ការប្រកួត​ចុងក្រោយ​ក្នុង EPL​។​

​កូនក្រុម​របស់លោក Pep Guardiola ឥឡូវ​នេះ​មាន​តែ​១​ពិន្ទុ​ពី​លើ​ក្រុម Liverpool នៅលើ​កំពូល​តារាង​ប៉ុណ្ណោះ​។ ពួកគេ​បាន​ប៉ះប៉ូវ​លទ្ធផល​ខកចិត្ត​នេះ​ជាមួយ​នឹង​ជ័យជម្នះ ១-៤ លើ​ក្រុម Southampton ក្នុង​ការប្រកួត FA Cup វគ្គ ១/៤ ផ្តាច់ព្រ័ត្រ មុន​ពេល​សម្រាក​អន្តរជាតិ​។​

​ក្រុម​មេឃ​ខៀវ​មាន​កីឡាករ​បួន​នាក់​ផ្សេង​គ្នា​នៅលើ​បញ្ជី​អ្នក​ស៊ុត​បញ្ជូលទី​ក្នុងឱកាស​នោះ​។ ពួកគេ​ក៏​ការពារ​រឹងមាំ​ផង​ដែរ​ថ្មីៗ​នេះ ដោយ​របូត​ត្រឹមតែ​១​គ្រាប់​គត់​ក្នុង​ការប្រកួត​ក្រៅ​ដី​៦​លើកចុងក្រោយ​។​

​អាស្រ័យហេតុនេះ Man City គ្មាន​រំពឹង​អ្វី​ក្រៅតែពី​លទ្ធផល​ឈ្នះ​នោះឡើយ​។ លទ្ធផល​ទស្សន៍ទាយ Man City ឈ្នះ ២-១៕​