Premier League វិលត្រឡប់​មក​វិញ​នៅ​ចុង​សប្តាហ៍​នេះ ខណៈ Liverpool ទទួល​ស្វាគមន៍ Watford ក្នុង​ការប្រកួត​ក្បាល​ព្រលប់​ថ្ងៃ​សៅរ៍​នេះ​ នៅ​កីឡដ្ឋាន Anfield​។​

​ក្រុម​ហង្ស​ក្រហម ​នឹង​សម្លឹង​ស្វែងរក​ជ័យជម្នះ​លើ​ក​ទី​១០​ជាប់ៗ​ក្នុង​ឱកាស​នេះ ហើយ​ពួកគេ​រំពឹង​អាចធ្វើ​បាន​។​

​កូនក្រុម​របស់លោក Jurgen Klopp បាន​ទាញយក​អត្ថប្រយោជន៍​ពី​ការ​របូត​ពិន្ទុ​មិន​រំពឹង​ទុក​មួយ​ចំនួន ​ពី​ក្រុម​មេឃ​ខៀវ Manchester City របស់លោក Pep Guardiola ដើម្បី​បង្រួម​គម្លាត​តាម​ពីក្រោយ​ពួកគេ​មក​នៅ​សល់​ត្រឹមតែ​១​ពិន្ទុ​នៅលើ​កំពូល​តារាង​។​

Liverpool នឹង​ត្រូវ​ប្រឈម​មុខ​ជា​មួយ​នឹង Man City នៅ​ជុំ​បន្ទាប់ ហើយ​ពួកគេ​ពិត​ជា​ចង់​បង្កើន​ទំនុកចិត្ត​បន្ថែម​ទៀត​ ជាមួយនឹង​ជ័យជំនះ​លើ​ក្រុម Watford ដែល​រង​ការគំរាមកំហែង​ពី​ការ​កាត់​ចោល​នៅ​ថ្ងៃ​សៅរ៍​នេះ​។​

​ក្រុម​ភ្ញៀវ​ថ្ងៃនេះ​មាន​ភារកិច្ច​ធំ​ប៉ុន​ភ្នំ​ដើម្បី​សង្គ្រោះ​ខ្លួនឯង​ពី​ការ​ធ្លាក់​នៅ​រដូវ​កាល​ក្រោយ​។ ពួកគេ​ឈរ​នៅ​លេខ​រៀង​ទី ៣ ពី​បាត​តារាង​ក្នុង​ក្របខ័ណ្ឌ Premier League នៅពេលនេះ ប៉ុន្តែ​កំពុង​ឈរ​នៅ​ពីក្រោម​ក្រុម​ស្ករ​គ្រាប់ Everton តែ​៣​ពិន្ទុ​ប៉ុណ្ណោះ​នៅក្នុង​តំបន់​សុវត្ថិភាព​។​

​ក្រុម​ស្ករ​គ្រាប់​ក៏​មាន​២​ប្រកួត​ក្នុង​ដៃ​ផង​ដែរ​នៅលើ Watford ។ ទោះយ៉ាងណា Watford សឹងតែ​គ្មាន​សង្ឃឹម​សូម្បី​ស្មើ​នៅ​ទឹកដី​របស់​ក្រុម​ប្រជែង​ពាន Liverpool ជា​ពិសេស​ពេល​ដឹងថា Liverpool មាន​កំណត់ត្រា​ដ៏​អស្ចារ្យ​ក្នុង​ទឹកដី Anfield នៅ​រដូវ​កាល​នេះ ដោយ​ឈ្នះ ១១ ស្មើ ៣ ក្នុង ១៤ លើក​។​

​ទ័ព​របស់​លោក Klopp របូត​តែ ៧ គ្រាប់​ប៉ុណ្ណោះ​ក្នុង ១៤ ប្រកួត​ក្នុងផ្ទះ​នៅ​រដូវ​កាល​នេះ​។ Watford ខកខាន​ស៊ុត​បាល់​បញ្ចូល​ទី​ក្នុង​ការប្រកួត​ចំនួន ៤ ដង​នៃ​ការប្រកួត Premier League ៦ លើក​ចុង​ក្រោយ​នៅ​ក្រៅ​ទឹកដី​។ ហេតុ​ដូច្នេះ​យើង​គ្មាន​រំពឹង​អ្វី​ក្រៅតែពី​ជ័យជម្នះ​យ៉ាង​ងាយស្រួល​សម្រាប់ Liverpool ក្នុង​លទ្ធផល​ទស្សន៍ទាយ ២-០​៕