ក្លឹបនៅអ៊ឺរ៉ុបត្រូវបានអនុញ្ញាតឱ្យចុះឈ្មោះកីឡាករពីររូបបន្ថែមទៀត ដែលចុះហត្ថលេខាពីក្លឹបរុស្ស៊ី ឬអ៊ុយក្រែន ទៅកាន់ក្រុមរបស់ពួកគេក្នុងការប្រកួត UEFA។

គណៈកម្មាធិការប្រតិបត្តិរបស់ UEFA​ បានសម្រេចចិត្តធ្វើវិសោធនកម្មបទប្បញ្ញត្តិនៃការប្រកួត UEFA Champions League ឆ្នាំ 2021/22, 2021/22 UEFA Europa League និង 2021/22 UEFA Europa Conference League និងអនុញ្ញាតឱ្យក្លឹបចុះឈ្មោះកីឡាករថ្មីចំនួន ២នាក់បន្ថែមទៀត​ សម្រាប់ការប្រកួតដែលនៅសល់គិតត្រឹមថ្ងៃទី១ ខែមេសា ឆ្នាំ២០២២ រហូតដល់បញ្ចប់។ 

ស្ថាប័នគ្រប់គ្រងបានប្រកាសបទប្បញ្ញត្តិថ្មីកាលពីថ្ងៃចន្ទនេះ ដោយកំណត់ថ្ងៃផុតកំណត់នៅថ្ងៃទី១ ខែមេសា សម្រាប់កីឡាករថ្មី ដើម្បីធ្វើការចុះឈ្មោះ។

ការផ្លាស់ប្តូរនេះ ត្រូវបានធ្វើឡើងបន្ទាប់ពី FIFA បានព្យួរកិច្ចសន្យារបស់កីឡាករបរទេសនៅក្លឹបអ៊ុយក្រែន និងរុស្ស៊ីសម្រាប់រយៈពេលដែលនៅសល់នៃរដូវកាល 2021-22៕