កីឡាករបាល់ទាត់មួយចំនួន ក្រោយបញ្ចប់អាជីព​ បានសម្រេចចិត្តបន្ត​ការងារ​ជាគ្រូបង្វឹកដោយសារចិត្តស្រឡាញ់។ ថ្ងៃនេះសូមបង្ហាញ​គ្រូបង្វឹកបាល់ទាត់ចំនួន៦រូប​ ដែល​មានទ្រព្យសម្បត្តិច្រើនបំផុតនៅលើពិភពលោក។

៦. លោក Pep Guardiola
គ្រូបង្វឹកដែលជោគជ័យខ្លាំង​ ក្នុងការដឹកនាំក្លិប​ Barcelona និងក្រុម Manchester City លោក Pep Guardiola ជាគ្រូបង្វឹកបាល់ទាត់ទី៦​ដែល​ មានទ្រព្យសម្បត្តិច្រើនបំផុតក្នុងពិភពលោកជាមួយទ្រព្យសម្បត្តិមានតម្លៃប្រមាណ​៦០​លាន​ដុល្លារ។ លោកបានក្លាយជាគ្រូបង្វឹកទី១ ត្រូវបានចារក្នុងប្រវត្តិ​សាស្ត្រ​ក្លិប Man City ដែល​បាន​ឈ្នះពានរង្វាន់៣ ក្នុង១រដូវកាល​គឺ​ពានរង្វាន់ UEFA Champions Leagues, Premier League និង FA Cup។

៥. លោក Sir Alex Ferguson
លោក Sir Alex Ferguson ជាគ្រូបង្វឹកដែលទទួលបានជោគជ័យបំផុតក្នុងប្រវត្តិសាស្ត្របាល់ទាត់របស់ចក្រភពអង់គ្លេស ក្រោយធ្លាប់ឈ្នះពានរង្វាន់ក្របខ័ណ្ឌ Premier League ចំនួន១៣លើកជាមួយក្រុម Manchester United។ ទោះបច្ចុប្បន្ន លោកបានចូលនិវត្តន៍ហើយ ប៉ុន្តែបុរសវ័យ៨២ឆ្នាំម្នាក់នេះ នៅឈរនៅលេខរៀងទី៥ ក្នុងនាមជាគ្រូបង្វឹកបាល់ទាត់មានទ្រព្យសម្បត្តិច្រើនបំផុតនៅលើពិភពលោកជាមួយទ្រព្យសម្បត្តិសរុប៧០លានដុល្លារ។

៤. លោក Zinedine Zidane
អតីតខ្សែបម្រើលំដាប់ពិភពលោក Zinedine Zidane ក្រោយបញ្ចប់អាជីពពី​​កីឡាករបាល់ទាត់ លោក​បានចាប់ផ្ដើមអាជីពជាគ្រូបង្វឹក ហើយទទួលបានជោគជ័យខ្លាំងបំផុតអំឡុងពេលដឹកនាំក្រុមអធិរាជស Real Madrid។ គ្រូបង្វឹក​វ័យ៥២ឆ្នាំ ត្រូវបានគេប៉ាន់ស្មានថា មានទ្រព្យសម្បត្តិសរុបប្រមាណ១២០លានដុល្លារ ហើយឈរជាគ្រូបង្វឹកបាល់ទាត់ទី៤លើពិភពលោកមានទ្រព្យសម្បត្តិច្រើនបំផុត។

៣. លោក José Mourinho
ម្ចាស់​ពានរង្វាន់គ្រូបង្វឹកដឹកនាំក្លិបអាជីពល្អបំផុតលើពិភពលោកចំនួន៣លើក លោក José Mourinho ឈរនៅលេខរៀងទី៣ ជាគ្រូបង្វឹកដែលមានទ្រព្យសម្បត្តិច្រើនបំផុត។ លោក​មាន​ទ្យព្យសម្បត្តិសរុប​១២០លានដុល្លារ។ គ្រូបង្វឹក​វ័យ​៦១ឆ្នាំបច្ចុប្បន្នកំពុងដឹកនាំក្រុម Fenerbahçe ក្នុងប្រទេសតួកគី។

២. លោក Diego Simeone
អ្នកចាត់ការបាល់ទាត់សញ្ជាតិអាហ្សង់ទីន លោក Diego Simeone បានចាប់ផ្តើមអាជីពជាកីឡាករ ដោយលេងជាខ្សែបម្រើ។ សព្វថ្ងៃនេះ លោក​ជាគ្រូបង្វឹកដឹកនាំក្រុមបានយូរជាងគេក្នុងពានរង្វាន់ La Liga បន្ទាប់ពីចាប់ផ្តើមជាមួយ Atletico Madrid ក្នុងឆ្នាំ២០១១។ កាលពីខែវិច្ឆិកា ឆ្នាំ​២០២៣​ លោក​បានចុះហត្ថលេខាលើកិច្ចសន្យារយៈពេល​៣ឆ្នាំ​ជាមួយក្លិប​ដែលមានតម្លៃប៉ាន់ស្មាន ១៧.៦លានដុល្លារក្នុងមួយឆ្នាំ។ បច្ចុប្បន្ន លោកកំពុងឈរលេខ២ ជាគ្រូបង្វឹកមានទ្រព្យសម្បត្តិច្រើនបំផុតក្នុងពិភពលោកជាមួយទ្រព្យសម្បត្តិសរុបប្រមាណ១៣០លានដុល្លារ។

១. លោក Wayne Rooney
លោក Wayne Rooney ជាគ្រូបង្វឹកបាល់ទាត់ក្មេងជាងគេ កំពុង​ឈរនៅលេខ១ ក្នុងនាមជាគ្រូបង្វឹកបាល់ទាត់មានសម្បត្តិច្រើន​បំផុត​ប្រមាណ១៧០លានដុល្លារ។ ក្រោយបាន​ចូលនិវត្តន៍​ពី​កីឡាករនៅឆ្នាំ២០២១ លោក​បានក្លាយគ្រូបង្វឹកក្លិបបាល់ទាត់អង់គ្លេស Derby County។ ចំពោះទ្រព្យសម្បត្តិដ៏ច្រើនបែបនេះគឺមិនមែនបានមកដោយសារការងារជាគ្រូបង្វឹក​ទាំង​ស្រុង​នោះទេ ប៉ុន្តែ​​ជា​ទ្រព្យសម្បត្តិ​រកបាន​កាល​នៅជាកីឡាករ មុន​ពេល​ក្លាយជាគ្រូបង្វឹក៕