Mohamed Salah បានស៊ុតបញ្ចូលទីគ្រាប់បាល់ជ័យជំនះនៅកីឡដ្ឋាន Anfield កាលពីថ្ងៃអាទិត្យ​ ដែល Liverpool បានវាយបកយកឈ្នះ Brighton ២-១ ឡើងទៅឈរនៅកំពូលតារាង Premier League​ ។

ក្រុមរបស់លោក Jurgen Klopp មានការស្រឡាំងកាំង នៅពេលដែលកីឡាករ Danny Welbeck បានស៊ុតបាល់បញ្ចូលទីយ៉ាងសាហាវ នាំមុខក្រុមម្ចាស់ផ្ទះ Liverpool ត្រឹមតែ ៨៧វិនាទី នៃការប្រកួតយ៉ាងស្វិតស្វាញរវាងក្រុមទាំងពីរ ដោយការវាយសម្រុកទៅវិញទៅមក។

ប៉ុន្តែក្រុមម្ចាស់ផ្ទះ បានបញ្ចប់ដោយការវាយមកយកជ័យជំនះ​ ដែលកីឡាករ Luis Díaz រកបានគ្រាប់បាល់តាមស្មើដោយការស៊ុតបាល់បញ្ចូលទីនៅនាទី២៧​ មុនពេលដែល​Mohamed Salah រកបានគ្រាប់បាល់ជ័យជំនះពីការបញ្ជូនបាល់ដ៏ល្អពីកីឡាករ Alexis Mac Allister នៅនាទី៦៥។

បច្ចុប្បន្ន​ Liverpool​ មាន​ ៦៧​ ពិន្ទុ​ពី​ការលេង​ ២៩​ ប្រកួត​ ដែល​ធ្វើឱ្យ​ហង្សក្រហមមាន​ប្រៀប​លើ Arsenal និង Manchester City ដែល​ប្រកួតស្មើ ០-០ នៅ​ថ្ងៃ​អាទិត្យ៕