ក្រុមអ្នកសង្កេតការណ៍របស់ Manchester United បានធ្វើដំណើរទៅកាន់ប្រទេស Senegal ដើម្បីមើលតារាឆ្នើមរបស់ក្រុម Barcelona B គឺកីឡាករ Mikayil Faye។ ខ្សែការពារកណ្តាលវ័យ ១៩ ឆ្នាំរូបនេះ បានបង្ហាញខ្លួនជាអន្តរជាតិលើកដំបូង ទល់និង Gabon កាលពីថ្ងៃសុក្រ ដោយបានស៊ុតបញ្ចូលទីដ៏អស្ចារ្យ ដើម្បីជួយ Senegal ឈ្នះការប្រកួតមិត្តភាព ៣-០។

យោងតាមសារព័ត៌មានរបស់ប្រទេសអេស្ប៉ាញ ​​Mundo Deportivo បានឱ្យដឹងថា មានអ្នកតំណាងរបស់ United នៅក្នុងការប្រកួត​រវាង​ Senegal និង​ Gabon ដើម្បីមើលតារាវ័យក្មេង​ប្រកួត ដែលបានតាមដានអស់រយៈពេលជាច្រើនខែមកហើយ។

បិសាចក្រហមត្រូវបានរំពឹងថា នឹងបាត់បង់ Raphael Varane នៅរដូវក្តៅនេះ ដោយខ្សែការពារសញ្ជាតិបារាំងរូបនេះ នឹងត្រូវផុតកុងត្រាជាមួយក្លឹប។ Lisandro Martinez ក៏មានបញ្ហារបួសក្នុងរដូវកាលនេះ ខណៈដែល Victor Lindelof ក៏បាត់បង់ការពេញចិត្ត ក្រោមការដឹកនាំរបស់លោក Erik ten Hag ផងដែរ។

កត្តាខាងលើទាំងនេះ ទំនងជាបង្កើនចំណាប់អារម្មណ៍របស់ក្លឹបទៅលើ Faye ដោយគ្រូបង្វឹកសញ្ជាតិហូឡង់ ទំនងជាត្រូវការការពង្រឹងតំបន់ខ្សែការពារ។ Faye ក៏​អាច​លេង​ជា​ខ្សែ​ការពារ​ឆ្វេង​ កត្តា​មួយ​ទៀត​ដែល​ United ទំនង​ជា​ចង់គ្រប់គ្រងលើបញ្ហា​សុខភាព​របស់​ Luke Shaw ផង​ដែរ៕