ការប្រកួតនៅក្នុងក្របខ័ណ្ឌកំពូលរបស់អេស្ប៉ាញថ្ងៃសៅរ៍នេះ នឹងនាំមកនូវការប្រកួត El Clasico ជាលើកដំបូងក្នុងរដូវកាលនេះ​ ខណៈដែល Barcelona និង Real Madrid ត្រូវប៉ះគ្នានៅក្នុងកីឡដ្ឋាន Estadi Olímpic Lluís Companys ​ដោយ​ក្រុម​ទាំង​ពីរ មានគម្លាតពីគ្នាត្រឹមតែ១ពិន្ទុប៉ុណ្ណោះ។

Barcelona ដែលកំពុងឈរនៅលេខ៣ ក្នុងតារាង ជាក្លឹបតែមួយគត់ដែលមិនទាន់ស្គាល់ចាញ់ សម្រាប់ការប្រកួតក្នុងស្រុករដូវកាលថ្មីនេះ។ លទ្ធផលសរុប​ពីការលេង​ ១០​ ប្រកួតរដូវកាលថ្មីនេះ​ Barcelona ឈ្នះ​ ៧​ ប្រកួត និង​​ស្មើ​ ៣​ ប្រកួត​ដែលជ័យ​ជម្នះ​ទាំង​ ៧​ ប្រកួតនេះ​មាន​ ៥​ ប្រកួតជាការលេងនៅក្នុងទឹកដីខ្លួនឯង។ 

អ្វីដែលជាចំណុចសំខាន់បានបង្ហាញថា Barcelona ប្រកួតចាញ់តែ​ ១​ ប្រកួតគត់ក្នុងចំណោម ២៤ ប្រកួតចុងក្រោយក្នុងទឹកដី ដោយឈ្នះមិនតិចជាង ២០​ ប្រកួត ដែលរួមបញ្ចូលទាំងឈ្នះ Real Madrid ២-១ កាលពីពាក់កណ្តាលខែមីនាផងដែរ។

ចំណែកឯ​ក្រុម​ភ្ញៀវ​ Real Madrid វិញ​ បច្ចុប្បន្នកំពុងឈរនៅកំពូលតារាងក្នុងលីគ​ ដោយមានពិន្ទុស្មើគ្នាជាមួយក្រុមឈរលេខ២​ Girona ប៉ុន្តែ​ Real Madrid មានគ្រាប់បាល់ស៊ុតបញ្ចូលទីច្រើនជាង។ 

Real Madrid ចាញ់​តែ​ ១​ ប្រកួតគត់មក​ទល់​ពេល​នេះ​ ប៉ុន្តែ​ក្រុម​របស់​លោក Carlo Ancelotti​ បច្ចុប្បន្នឈ្នះ​មិន​តិច​ជាង​ ៨​ ប្រកួតទេ​ឆ្លងកាត់ពីការលេង ១០​ ប្រកួត​រដូវកាលថ្មីនេះ។

ការព្យាករណ៍​ :​ ជំនួបនាពេលថ្មីៗនេះនៅក្នុងការប្រកួត El Clasico បានឱ្យឃើញថា Barcelona ជាជម្រើសជាទីពេញចិត្ត ដោយឈ្នះ​ Real Madrid ៦​ ប្រកួតក្នុងចំណោមការជួបគ្នា​ ៨​ ប្រកួតចុងក្រោយ។ 

ទម្រង់លេងរបស់ក្រុមទាំងពីរខ្លាំងដូចគ្នារហូតមកដល់ពេលបច្ចុប្បន្ន ដូច្នេះក្រុមទាំងពីរមើលទៅទំនងជានឹងរកគ្រាប់បាល់បាន​ ហើយអាចត្រឹមតែបញ្ចប់ការប្រកួតដោយស្មើគ្នា។

ដូច្នេះជម្រើសចម្បងរបស់យើងនៅក្នុងការប្រកួតនេះគឺ​ ស្មើ ដោយក្រុមទាំងពីរមានគ្រាប់បាល់ស៊ុតបញ្ចូលទីគ្នា៕